James, Curry, Harden, Durant una sa U.S. Team ng Olympics

Pamumunuan nina NBA superstars Lebron James ng LA Lakers, Stephen Curry ng Golden State Warriors, James Harden ng Houston Rockets at Kevin Durant ng Brooklyn Nets ang nasa listahan ng 44-man strong pool para sa mga pagpipiliang kakatawan sa koponan ng U.S. basketball sa 2020 Tokyo Olympics.

Inihayag ni USA basketball men’s team Managing Director Jerry Colangelo na puputulin sa 12-man team final line-up ang sasabak sa Summer Games simula Hulyo 24-Agosto 9 sa Tokyo, Japan. Inaasahang mababawasan ang nasabing pool ng manlalaro dahil maaaring magwi-withdraw ang iba, habang tinitingnang matatanggal sa final cut ang iba rito. Gayunpaman, lahat ng mga nasa listahan ng manlalaro ay nagpahayag ng interes na mapabilang sa proseso. “This is the first step in USA Basketball identifying the 12 players who will represent the United States as members of the 2020 US Olympic men’s basketball team in Tokyo,” pahayag ni Colangelo sa statement.

Sa pag-aasam na makuha ang kanilang ika-apat na sunod na Olympic gold simula 2008, 2012, at 2016 ay mamanduhan sila ni San Antonio head coach Gregg Popovich. Bagaman nanaig ang mga ito ng naturang kampeonato, bigo ang basketball program ng Team-USA sa nakalipas na World Cup nang tumapos ito sa pinakamababang ending sa kompetisyon na 7th place.

Kabilang sa listahan sina Bam Adebayo ( Heat), LaMarcus Aldridge (Spurs), Harrison Barnes (Kings), Bradley Beal (Wizards), Devin Booker (Suns), Malcolm Brogdon (Pacers), Jaylen Brown (Celtics), Jimmy Butler (Heat), Mike Conley, Anthony Davis, DeMar DeRozan, Andre Drummond, Paul George, Draymond Green, Montrezl Harrell, Joe Harris, Tobias Harris, Gordon Hayward , Dwight Howard, Brandon Ingram , Kyrie Irving, Kyle Kuzma, Kawhi Leonard, Damian Lillard, Brook Lopez, Kevin Love, Kyle Lowry, JaVale McGee, Khris Middleton, Donovan Mitchell, Victor Oladipo, Chris Paul, Mason Plumlee, Marcus Smart, Jayson Tatum, Klay Thompson, Myles Turner, Kemba Walker, Russell Westbrook at Derrick White.