Parbuster Ardina, nangunguna sa Australian Ladies Pro Golf

Matalas ang ratsada ng mga hataw ni Pinay par­buster Dottie Ardina sa mga golf courses ng konti­nen­teng tinatawag na “Land From Down Under” at kasa­lukuyang nangunguna siya sa Clubcar Series ng Aus­tralian Ladies Professional Golf (ALPG) dahil sa naku­lektang 973.33 puntos.

Malaking tulong sa pag­hawak niya ng trangko ay nang iniuwi niya ang korona ng 2020 Ballarat Icons Pro-Am Tournament na nagka­ka­halaga ng $4,500 at may kaakibat na 500 puntos. Nag­­marka rin si Ardina sa Aoyuan International Moss Vale Pro-Am matapos si­yang sumegunda rito at mag­bulsa ng gantimpalang $3,000. May nalikom rin si­yang 400 series points mula sa nabanggit na torneo. Pam­pito naman ang nairehis­trong pagtatapos ng Pinay golfer sa Findex Yamba Pro-Am.

Eksaktong 400 puntos sa likod ng anim na taong pro mula sa Canlubang ay si Celine Herbin na nakukun­tento sa pangalawang pu­westo habang nakaupo sa pangatlong baitang bitbit ang kartadang 512.5 puntos si Holly Clyburn.

Umakyat din sa pang-anim na posisyon si Ardina sa ALPG Order of Merit matapos niyang maisalba ang isang Top 20 performance sa ISPS Handa Vic Open noong nakaraang linggo. Halagang $18,120.71 ang pabuya sa kanyang naipakita sa Beach Golf Links kung saan gina­nap ang kompetisyon. Dito rin nasaksihan ang dala­wang beses kalusan ng mga kalahok upang malaman kung sinu-sino lang ang mga puwedeng magpatuloy sa Round 3 at sa Round 4. Ang 2-under-par 278 strokes na iskor ni Ardina ang nagtawid sa kanya papunta sa huling round. Kasalukuyang hu­ma­hataw sa Australian Open ang 26-anyos na dating pamo­song jungolfer ng Pilipinas.