Mabagal na pensiyon, iimbestigahan

Pagpapaliwanagin sa Kamara ang Department of Social Welfare and Development (DSWD) dahil sa kabagalan umano ng pagbibigay ng buwanang pensiyon sa mga nakatatanda o senior citizen.

Inihain ni Senior Citizen Partylist Rep. Francisco Datol ang House Resolution 656 upang alamin ang dahilan ng naaantalang pensiyon at kung paano maisasaayos ang sistema nang hindi na mabitin ang mga nakatatanda sa pagtanggap ng P500 pensiyon kada buwan.

Aabot aniya sa mahigit 3.7 milyong mahihirap na senior citizens ang naghihintay pa rin na makuha ang kanilang biyaya mula noong nakaraang taon. Sa kabila ito ng P23 bilyong alokasyon sa 2019 National Budget para sa Social Pension Program for Indigent Senior Citizens.

Giit ni Datol, may sapat na panahon naman ang DSWD para naipamahagi na sana ang pensiyon ng mga mahihirap na nakatatanda ngunit, hindi pa rin ito nagagawa.