Hinuli sa buy-bust, dapat dumaan sa preliminary investigation bago kasuhan
Dear Chief Acosta, Inaresto sa buy-bust operation ang anak ko sa kasong ilegal na pagbebenta ng shabu. Base sa aking limitadong kaalaman bilang dating mag-aaral ng batas, napansin ko na walang naganap na preliminary investigation. Bukod pa rito ay hindi rin nasunod ang procedure sa pag-aresto ayon sa Section 21 ng Republic Act (R.A.) No. 9165. Dahil dito, nais kong malaman kung tama ba na walang preliminary investigation na naganap? - Cobi
Dear Cobi, Upang masagot ang inyong katanungan, nais naming ituon ang inyong atensiyon sa kasong may titulong People vs. Lim (G.R. No. 231989, September 4, 2018) na isinulat ni Honorable Chief Justice Diosdado M. Peralta, kung saan sinasabi ng Korte Suprema na kailangang sumailalim sa preliminary investigation ang kaso tungkol sa ilegal na droga kapag walang ipinasang sinumpaang-salaysay ang mga pulis na umaresto kung bakit hindi nakasunod sa procedure na nakasaad sa Section 21 ng Republic Act (R.A.) No. 9165 o ang “Comprehensive Dangerous Drugs Act of 2002”, viz:
“Thus, in order to weed out early on from the courts’ already congested docket any orchestrated or poorly built up drug-related cases, the following should henceforth be enforced as a mandatory policy:
1. In the sworn statements/affidavits, the apprehending/seizing officers must state their compliance with the requirements of Section 21 (1) of R.A. No. 9165, as amended, and its IRR.
2. In case of non-observance of the provision, the apprehending/seizing officers must state the justification or explanation therefore as well as the steps they have taken in order to preserve the integrity and evidentiary value of the seized/ confiscated interns.
3. If there is no justification or explanation expressly declared in the sworn statements or affidavits, the investigating fiscal must not immediately file the case before the court. Instead, he or she must refer the case for further preliminary investigation in order to determine the (non) existence of probable cause.
xxx xxx xxx.” (Binigyang-diin)
Base sa nasabing kaso, dapat magkaroon ng preliminary investigation kahit pa man nahuli sa pamamagitan ng warrantless arrest tulad ng buy-bust operation kapag walang naipasang sinumpaang-salaysay ang mga nanghuling pulis kung bakit hindi nasunod ang mga procedure na nakasaad sa R.A. No. 9165. Dahil dito, nararapat na magkaroon ng preliminary investigation at maaari nating masabi na mayroon ngang pagkakamali sa agarang pagsampa ng kaso nang walang patunay na nasunod ang procedure na nakasaad sa Section 21 ng R.A. No. 9165 sa pamamagitan ng pagpapasa ng sinumpaang-salaysay kaugnay dito.
Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa isang abogado.
Comments