‘Mister’ nakaaway.. ‘Misis’ nahulog mula 6th flr. ng building, patay

Bumulusok mula sa ikaanim na palapag at bumagsak sa ikalawang palapag ng gusali ang 36- anyos na babae matapos ang naganap na pag-aaway sa kanyang live-in partner, kahapon ng umaga sa Tondo, Manila.

Hindi na naisalba ng mga doktor sa Mary Johnston Hospital ang biktimang si Maricel Arellano, cashier at residente ng Josefa Building, Padre Rada St., Tondo.

Batay sa imbestigasyon nina PEMS Donald Panaligan at PSSg Dennis Suba, alas-8:35 ng umaga nang mangyari ang insidente.

Nauna rito, nagtatalo umano ang biktima at ang sinasabing kinakasama nito na si Jose Dandreb Miano, 36, vendor.

Nagkaroon umano ng kalabugan sa loob ng kuwarto at ilang saglit pa ay lumabas umano ng silid ang suspek at naiwan ang biktima.

Ilang saglit pa lamang ang nakararaan nang makarinig umano ng malakas na kalabog at nakitang duguan na ang biktima.

Iniimbestigahan na ng pulisya kung may naganap na foul play sa pagkamatay ng biktima.