Paghanap sa mga posibleng may nCov, bilisan

Inatasan ni Senador Christopher ‘Bong’ Go ang Department of Health (DOH) na mabilis na hanapin ang iba pang pasahero ng eroplano na nakasama at nakasalamuha ng dalawang Chinese national na nagpositibo sa nCoV.

Nais ni Go, na siyang chairman ng Senate Committee on Health na mailagay sa persons under investigation ang mga nakasama ng dalawa para mabatid kung nahawaan sila o hindi.

Sa ngayon, tumutulong na rin sa DOH ang pamunuan ng Philippine Airlines, PNP-CIDG at iba pang ahensiya ng pamahalaan para mabilis na mahanap ang mga nakasabay ng dalawa sa eroplano.

Nangako naman si DOH Sec. Francisco Duque na gagawin ang lahat para mahanap at ma-account lahat ng pasahero ng eroplano at iba pang nakasalamuha ng dalawang Chinese. Humihingi na rin ang DOH ng emergency funds para sa pagbili ng mga face mask at iba pang gamit na kailangan ng mga health workers at mga taong mababa ang resistensiya para hindi sila kapitan ng sakit.