Magkakalat, tutuluyan.. Fake news sa nCoV, 12 years kulong

Maaaring makulong ng anim hanggang 12 taon ang sinumang mapatutunayang nagpapakalat ng fake news tungkol sa nCoV.

Ito ang babala ni Capt. Jeck Robin Gamad, tagapagsalita ng Anti-Cybercrime Group ng Philippine National Police, kasabay ng pahayag na may na-trace silang anim na fake news na kumakalat ngayon sa social media.

Ayon kay Gamad, kapag na-monitor nila ang fake news ay bineberipika nila ito sa official sources at kung mapatunayang peke ay inire-report nila sa Facebook Philippines para alisin ang orihinal na post.

Ang taong una at pinagmulan ng social media post ang mananagot sa paglabag sa Presidential Decree 90 o “Unlawful Rumor Mongering and Spreading of False Information”. Dahil aniya sa Republic Act 10175 o Anti-Cybercrime Law, sa halip na prison correctional ay aakyat ang kaparusahang pagkakakulong sa prison mayor.

Idinagdag ni Gamad na pupuwedeng mapanagot din ang mga nag-share ng fake news kaya inaabisuhan ang publiko na iwasan nang magpakalat ng mga hindi kumpirmadong impormasyon sa social media.