Hiwalay na ospital para sa mga nakahahawang sakit

Kailangan ikonsidera ngayon ng pamahalaan na magtayo ng isang ospital na mangangasiwa lamang sa lahat ng kaso ng mga communicable disease o nakahahawang sakit.

Ayon kay Quezon City Rep. Precious Hipolito Castelo, hindi sapat na magtayo lamang ng mga tent para maiwasang ma-contaminate o huwag lumaganap ang nakamamatay na sakit tulad ng 2019 novel coronavirus acute respiratory disease.

Kung mayroon aniyang medical facility para sa contagious illnesses na kumpleto at makabago ang kagamitan at may mga ekspertong hahawak sa sitwasyon ng bawat pasyente, hindi na ito lilikha ng pagpa-panic ng publiko kapag mahaharap sa sitwasyong tulad ng nCoV ARD.

Ani Castelo, kahit may San Lazaro Hospital at Research Institute for Tropical Medicine ng DOH, kulang ang mga ito ng makabagong teknolohiya upang labanan ang mga nakamamatay na virus.

Pareho pa umanong nasa matataong lugar ang RITM at San Lazaro Hospital na hindi naaangkop na lugar upang pangalagaan ang mga nabibiktima ng nakahahawang sakit.