Lahat ng drayber at konduktor, mag-face mask — LTFRB

Iniutos ng Land Transportation Franchising and Regulatory Board (LTFRB) sa lahat ng mga drayber at konduktor ng mga pampublikong sasakyan sa buong bansa na magsuot ng face mask habang nasa kalsada.

Sa ipinalabas na Memorandum Circular 2020-005 ng LTFRB, inoobliga ang lahat ng mga namamasada na magsuot ng face mask at ipinatitiyak sa mga may-ari ng prangkisa na nasusunod ito.

Nakasaad pa sa memorandum na kailangang siguruhin ng mga terminal operators ang tamang sanitasyon at kalinisan sa kanilang lugar at magbigay din ng mga libreng face masks at maglagay ng mga disinfectant o sanitizer dispensers para sa mga pasahero.

“All PUV drivers and conductors are directed to properly wear face masks at all times while on duty and for all franchise holders to ensure compliance, and all terminal operators must ensure proper sanitation and cleanliness in their premises, to provide face masks as wells as disinfectant or sanitizer dispensers for free use of passengers,” ayon sa memorandum.

Napagtibay ang memorandum circular kasunod ng special session sa Subic, Zambales matapos may makumpirmang isang bagong kaso ng 2019 novel coronavirus sa Pilipinas.