Naggo-golf habang naka-duty.. 3 PNP officials, sibak

Ikinapahamak ng tatlong matataas na opisyal ng Philippine National Police (PNP) ang hilig ng mga ito sa paglalaro ng golf matapos masibak sa posisyon.

Iniutos na ni PNP Chief General Archie Francisco Gamboa ang pagsibak kina Colonel Dennis Artil, Lt. Col. Richard Bad-Ang at Lt. Col. Glenn Mayam.

Nakikita umanong naglalaro ng golf ang tatlong pulis sa oras ng trabaho o weekdays kapag sila ay bored o naiinip.

“I have ordered the relief of three senior police officers of Central Visayas for violating my policy on not playing golf during weekdays,” anunsiyo ni Gamboa.

“They were playing there (golf course) Tuesdays and Wednesdays and kung bored sila they are playing on Wednesdays. That is why I have enough basis why they should be relieved,” dagdag pa ng heneral.

Sinabi pa ni Gen. Gamboa na maaari ring maapektuhan ang promotion ng naturang mga senior officers ng PNP.

Si Artil ay nakatalaga bilang Central Visayas Police Regional Comptroller, si Bad-Ang naman ang pinuno ng Central Visayas PNP finance service habang si Mayam ang hepe ng Central Visayas police Drug Enforcement Group. Tiniyak ni Gen. Gamboa na daraan sa due process ang pagsisiyasat sa mga opisyal.

Pansamantala muna silang ilalagay sa Personnel Holdings and Accounting Unit sa Camp Crame habang iniimbestigahan.

Diin pa ni Gen. Gamboa, pinapayagan naman ang paglalaro ng golf kung weekend o holiday o kung tapos na ang trabaho upang hindi ito makaabala sa pagganap ng tungkulin ng mga pulis.

Samantala, binalaan din ng PNP chief si Central Visayas Police Chief Brig. Gen. Valeriano de Leon kaugnay sa pagkasibak sa tatlong opisyal na nasa hurisdiksiyon nito.

“Strike one na si Regional 7 – Central Visayas Police Director. Hindi ako nag-set ng parameters so that everybody will be on their toes. Not necessarily na mag-one-strike ka bago kita i-relieve,” ayon pa kay Gen. Gamboa.