3 pulis, sibak sa sabong

Sinibak na sa serbisyo ang tatlong pulis na nahuling nagsasabong sa magkakahiwalay na insidente noong 2018 at 2019.

Ayon kay Brigadier General Alfred Corpus, ang pagsipa sa mga pulis ay batay sa resulta ng isinagawang summary hearing sa mga kasong administratibo laban sa kanila.

Tinukoy nito ang mga na-dismissed sa serbisyo na sina Chief Master Sgt. Dexter Lamanero, Corporal Warren Bejar at Corporal Mark Madisdis, pawang mga dating nakatalaga sa Sarangani at South Cotabato.

Mahigpit na ipinagbabawal ang sabong dahil paglabag ito sa Republic Act 6713 o Code of Conduct and Ethical Standards for Public Officials and Employees.

Si Lamanero ay nahuli umano sa loob ng sabungan sa Alabel, Sarangani noong Hulyo 8, 2018 habang si Madisdis ay nabuko sa pagsasabong sa Polomolok, South Cotabato noong Hulyo 9, 2018. Noong Agosto 19 ng nakaraang taon naman nabisto ang pagsasabong ni Bejar.

Hinihintay na ng PRO-12 ang pinal na kumpirmasyon mula sa National Police Commission tungkol sa nasabing desisyon.