Golfer Pagdanganan, angat na sa pro level

Tutuntong na ng professional level ang multi-titlist golfer na si Bianca Pagdanganan matapos mapagdesisyunan nitong maglaro na sa prestihiyosong Ladies Professional Golf Association (LPGA).

Inihayag ng 22-anyos na 2018 Asian Games team gold at individual bronze medalists sa report ng CNN Philippines na handa na itong iwan ang amateur ranks upang makipagsabayan sa mga pinakamahuhusay na women’s golfers sa buong mundo.

“I started golf when I was seven. I fell in love and turning pro was what I had in mind when I started playing,” pahayag nito sa nasabing report. “At one point I thought it was impossible because it’s a really tough sport but later on you start to realize that I was actually capable of doing so,” dagdag nito.

Nito lamang nakalipas na 30th Southeast Asian Games ay nagbulsa ng dalawang gold medals ang US NCAA University of Arizona Division I champion sa women’s individual at women’s team katulong si Lois Kaye Go, habang sa 2018 Jakarta-Palembang Games ay nakasama rin nito si Go at Yuka Saso para sa women’s team event upang talunin ang koponan ng South Korea at China.

“It was a good way to end my amateur career double gold, but I guess it’s just a confidence booster just to remind myself that I could play good golf and I hope I could keep it that way,” ayon pa rin sa report.

Malaki naman umano ang naging pag-angat ng laro ng Sports Management student ayon sa coach nitong si Carito Villaroman kung kaya’t nakikita niyang maganda ang magiging future nito. “I’ve never seen anyone out-groove her yet so I’m looking forward to seeing her play in the LPGA and see who can hit it farther than her,” saad ng coach sa naturang report.