Sanhi at tamang gamot sa an-an

Shane M. Ludovice, M.D / Sabi ni Doc

Dear Doc. Shane, Nagkaroon ng an-an sa mukha hanggang leeg ang aking bunsong anak. Hindi ito magandang tingnan, lalo na at morena siya. Ano ang puwedeng ipahid o gawin para mawala ito? – Edna

Sagot Ang an-an ay sakit sa balat na sanhi ng fungal infection. Ang an-an o tinea versicolor ay kadalasang nangyayari kapag ang fungus na natural na umiiral sa balat ng tao ay dumami.

Ang fungus na ito ay sumisira sa ibabaw ng balat at nag-iiwan ng mga puting patse sa balat.

Narito ang ilang dahilan kung bakit nagkakaroon ng an-an:

• Oily skin

• Naninirahan sa lugar na mainit ang klima

• Pawisin

• Mahina ang immune system

Ang organismo na sanhi ng an-an ay pangkaraniwan sa balat ng tao kaya hindi tulad ng iniisip ng karamihan, ang an-an ay hindi nakahahawa.

Ito ay puwedeng makaapekto sa lahat ng uri at kulay ng balat ngunit, mas karaniwan ito sa mga teenagers o young adults.

Ano ang gamot sa an-an?

Ang salicylic acid ay isa sa mga pinakamura at mabisang paraan ng paggamot sa an-an. Pagkatapos maligo, patuyuin ang buong katawan, partikular ang apektadong bahagi.

Kumuha ng bulak, basain ito ng salicylic acid at ipahid sa apektadong bahagi.

Tandaan: Ang salicylic acid ay nakasusunog ng balat kaya dapat mag-ingat sa paglalagay nito.

Ito ay maaaring ulitin pagkaraan ng dalawa o tatlong araw hanggang sa maalis na ang mga patse sa balat.

Paano makaiiwas sa an-an?

• Ugaliing maligo araw-araw.

• Makabubuti kung gagamit ng sabon na may sulfur dahil ito ay nakapapatay ng mikrobyo na sanhi ng mga kati-kati.

• Iwasan ang pagbibilad sa araw.

• Iwasan ang paghiram o pagpapahiram ng personal na mga gamit tulad ng damit o make-up kit.