Resbak ni P-Du30 sa mga Kano.. No Visa, No Entry

Oobligahin na ng gobyerno ng Pilipinas ang lahat ng Amerikano na kumuha ng Philippine visa bago pa man makapasok sa ating bansa.

Ito ang babala ng Malacañang sa planong pag-ban ng US na makapasok sa kanilang bansa ang mga opisyal ng Pilipinas na sinasabing nasa likod ng pagpapakulong kay Senadora Leila de Lima.

“Should a ban from entry into US territory be enforced against Philippine officials involved in or by reason of Senator De Lima’s lawful imprisonment, this government will require all Americans intending to come to the Philippines to apply and secure a visa before they can enter Philippine territory,” wika ni Presidential Spokesman Salvador Panelo sa press briefing sa Palasyo.

Matatandaang, nilagdaan ni President Donald Trump ang Washington’s 2020 National Budget kung saan kabilang ang probisyon na bawalan ang pagpasok sa United States ng mga sangkot umano sa pagkakadetine ni De Lima.

Samantala, ipinag-utos na ni Pangulong Duterte sa Bureau of Immigration (BI) na huwag papasukin sa Pilipinas sina US Senators Dick Durbin at Patrick Leahy na siyang nagsulong ng probisyon sa US 2020 Budget para pagbawalang makapasok ng Estados Unidos ang mga opisyal ng gobyerno ng bansa na sangkot sa pagpapakulong kay De Lima.