800 OFWs, balik-bansa na

Nasa 800 overseas Filipino workers (OFWs) mula Hong Kong at Riyadh ang dumating sa Ninoy Aquino International Airport (NAIA) Terminal 1, kahapon ng umaga.

Binigyan ng pamaskong handog ng Overseas Workers & Welfare Administration (OWWA) at Department of Labor & Employment (DOLE) ang naturang OFWs nang dumating sa NAIA.

Ang nasabing bilang ay pawang mga OFWs na nabigyan ng bakasyon ng kanilang mga employers para makasama ang kanilang mga mahal sa buhay sa pagsalubong sa Bagong Taon.

Sinalubong sila ng mga opisyal na sina OWWA Administrator Hanz Leo Cacdac at DOLE Secretary Silvestre Bello lll para personal na iabot ang pamasko at alalayan sa pagproseso ng kanilang mga dokumento sa Immigration counter palabas ng paliparan.

Nilinaw ni Cacdac, hindi sasagutin ng OWWA ang travel expenses ng mga OFW pauwi sa kanilang mga lalawigan dahil hindi naman sila mga distress OFW.