Sa kasagsagan ng Noche Buena.. Residential area, natupok

Nadamay masunog ang mahigit 20 bahay sa isang residential area kahapon ng madaling-arawsa kasagsagan ng Noche Buena sa Bacood St., Sta. Mesa, Manila.

Ayon kay FC Insp. Rae Sumedca ng Manila Fire Department, bandang ala-1:00 ng madaling-araw nang sumiklab ang sunog sa ground floor ng isang pintuang apartment.

Agad umanong kumalat ang apoy dahil karamihan ng bahay ay gawa sa mga light materials.

Ayon kay Joy Galzote, isa sa mga tenants, inakala niyang may away dahil may naririnig silang sigawan pero, nang lumabas ay nakita nilang malaki ang sunog kaya nagsilabas na lamang sila ng bahay.

Wala namang nasaktan sa insidente na idineklarang fireout alas-2:00 ng madaling-araw.

Samantala, nadamay din sa sunog ang isang tindahan sa lugar.

Nasa P300,000 naman ang halaga ng napinsalang ari-arian habang patuloy ang imbestigasyon sa insidente.