Cayetano, itinaob sina P-Digong, VP Leni at Sen. Tito sa pataasan ng rating

Ka Ambo / Bistado

Lumabas na ang resulta ng Pulse Asia survey.

Umangat nang todo ang top 4 leaders ng bansa!

◘◘◘

ISINAGAWA ang survey noong Disyembre 3 hanggang 8.

Umangat ang trust at approval ratings nina Pangulong Rodrigo Duterte, VP Leni Robredo, Senate Pres. Vicente “Tito” Sotto III at House Speaker Alan Peter Cayetano!

◘◘◘

PINAKAMALAKI ang pag-angat ni Cayetano, 16% ang itinaas nito kung saan mula sa dating 64% na trust ay pumalo ito sa 80% habang ang kanyang approval rating ay 14% naman ang itinaas kung saan mula sa dating 62% ay 76% na ito.

Samantala, parehong 12% ang itinaas ng approval rating ni Sotto at pareho ring 9% ang itinaas ng trust at approval rating ng pangulo. Walong porsiyento naman ang itinaas ng approval rating ni VP Leni at 7% ang itinaas ng kanyang trust rating.

Kung susumahin, umangat nang husto si Cayetano kumpara sa ibang lider!

◘◘◘

NAKATULONG kay Cayetano ang performance ng Kamara. Naiproseso ng Kamara ang 900 panukalang-batas mula Hulyo hanggang ngayong Disyembre.

Sa kasaysayan, ngayon lamang nakapagtala ng mataas na grado sa survey ang Speaker ng Kamara kumpara sa mga nagdaang panahon!

◘◘◘

NOON, nagmamarka lamang ng 40 percent ang ratings ng Speaker. Ayon kay Majority Floor Leader Martin Romualdez, halos 28 panukalang-batas kada araw ang naiproseso.

Ganap nang naging batas ang Malasakit Center at ang pagpapaliban sa barangay elections!

◘◘◘

NAKATAKDA nang lagdaan ni P-Digong ang 2020 General Appropriations Act, Sin Tax at Salary Standardization.

Nasa 93 panukala na ang nasa 3rd o final reading. Kabilang ang pagpapababa sa optional retirement ng mga kawani ng pamahalaan mula 60 patungong edad 56!

◘◘◘

KUMBAGA sa matagumpay na 30th SEA Games, sobrang laki ng iskor ng Kamara ng mga representante.

‘Nganga’ ang mga kritiko!