Tricycle driver, sinalvage

South Cotabato — Isang bangkay ng lalaki na biktima ng salvage ang natagpuan kamakalawa sa Bgy. Kablon, Tupi.

Ang biktima ay kinilala ng pulisya na si Rommel Evangelista, residente ng Bgy. Fatima, General Santos City.

Nabatid na ilang residente ang nakatagpo sa bangkay ng biktima na may saksak sa iba’t ibang bahagi ng katawan, nakabalot ng packaging tape ang mukha at nakatali ang mga kamay at paa.

Sa imbestigasyon ng pulisya, maaari umanong pinatay sa ibang lugar ang biktima at itinapon lang sa nasabing lugar ang bangkay nito upang iligaw sa imbestigasyon ang mga awtoridad.

Samantala, patuloy ang imbestigasyon ng pulisya para makilala ang mga salarin at motibo sa krimen.