Kahit sa Dec. 25 pa ipapalabas… kampo ni Aga, todo-celebrate na sa tagumpay ng MMFF movie

Nitz Miralles / Bida

Dalawang beses na yatang na­pa­nood ni Aga Muhlach ang pelikula niyang Miracle in Cell No. 7 na entry ng Viva Films sa MMFF, pero ma­tindi pa rin ang dating sa kanya lalo na sa pre­miere night nito dahil lahat ng katabi niya sa Cinema 1 ng SM Megamall ay nag-iiyakan.

Nang makausap si Aga after ng premiere night, overwhelmed ito lalo na nang mag­palakpakan ang mga tao at marinig ang feedback na maganda ang pelikula. Tiyak na naisip ni Aga na tama ang desisyon ni­yang gawin ang pelikula.

Kasama ni Aga ang asawang si Charlene Gonzales at anak na si Atasha Muhlach na parehong namumula at namumugto ang mga mata sa kaiiyak. Gustung-gusto ni Char­lene ang movie at panonoorin niya nang 10 times pa. Hindi nila kasama ang anak na si An­dres dahil may exam daw kahapon (Dec. 17).

Natawa si Charlene nang ipaalala sa kan­ya ng mga reporter friends niya ang pangako ni Aga na win or lose sa pagka-Best Actor, magpapa-party siya sa press people. Sabi ni Charlene, narinig niya ang OPM ni Aga at ipapaalala niya rito.

Samantala, ipinost ni Aga ang message sa kanya ni Atasha after watching the mo­vie at sabi ng aktor, “When your daughter sends you this message...sorry @atasha­muh­lach_ had to share your message. Best Christmas gift! Love you much!”

Heto ang message ni Atasha kay Aga: “Hey dad, I just wanted to say that I’m so proud to be your daughter. That movie was genuinely amazing and no other person could have done that role better than you. All the hard work and effort you put into that movie was seen and clearly paid off- I loved the movie and I’m sure that everyone else will love it as well but congrats, the long wait is finally over and time to celebrate because you deserve it but congrats dad for the amazing movie and I’m so proud. Love you.”

Nanood ng premiere night sina Herbert Bautista and son Race Matias, Mark Bautista, Director Paul Soriano at Cristine Reyes.

Dumating din at nanood sa premiere night ang director at producer ng original Korean movie na sina Mr. Lee Hwan-kyung at Mr. Kim Min-ki para supor­ta­han ang Filipino adaptation ng Miracle in Cell No. 7 na ipapalabas simula sa Dec. 25.