Knott, binasag ang record ni Lydia; Women's epee, naka-gold

Clark - Ipinakita ni Kristina Knott ang kanyang tulin sa takbuhan para bumasag ng mga nakaukit na record at maka-gold sa 30th Southeast East Asian Games. Inirehistro ni Fil-American Knott ang 23.07 seconds sa women’s 200m heat ng 30th SEA Games Athletics kahapon sa New Clark Athletic Stadium.

Binura ng 24-anyos na si Knott, na mag-ensayo sa United States ang 18-year-old SEAG record na 23.30 na inilista ni Thai Supavadee Khawpeag sa 2001 Kuala Lumpur edition. Nilampasan din ni Knott ang Philippine record na 23.50 seconds na itinarak ni legend Lydia de Vega-Mercado sa US may 33 taon na ang nakalipas.

Lumaki sa Florida si Knott, noong Oktubre ay nagwagi siya ng gold sa 200-m dash test event. Samantala, karagdagang gold medal ang nakamit kahapon ng Philippine Fencing Team sa pamamagitan ng kanilang women’s epee team sa 30th Southeast Asian Games fencing competition sa World Trade Center sa Pasay City.

Ginapi ng trio nina Harlene Raguin, Hanniel Abella at Anna Gabrielle Estimada ang katunggaling Singaporean team sa finals, 45-38 upang makopo ang gold. Nabigo naman sina Shawn Felipe, Nathaniel Perez, Michael Nicanor at Jaime Viceo V , 45-40 sa koponan ng Thailand sa semifinals ng men’s team foil kung kaya nagkasya na lang sila sa bronze.