Patrombon at Lim, bronze sa tennis individual event

Nagwagi ng bronze medals para sa Team Philippines ang mga tennis players na sina Jeson Patrombon at AJ Lim sa Men’s individual category ng 30th Southeast Asian Games tennis competition kahapon sa Rizal Memorial Tennis Center.

Impresibo ang umpisa ng kampanya ng 2-time bronze medalist na si Patrombon kung saan tinalo nya 6-1, 6-1 ang Laos bet na si Sataporn Simmalavong na sinundan nya ng isa uling 6-1, 6-1 na panalo kontra sa Malaysian na si Shamirul Shahril Mohd Adam Das sa quarterfinals.

Pero bigo siyang ituloy ang kanyang momentum nang matalo ang 26-anyos na si Patrombon sa Vietnamese na si Hoang Nam Ly sa semis, 7-5, 1-6, 3-6.

Hindi naman nalalayo ang nangyari para sa 20-anyos na si Lim na naunang dinomina, 6-0, 6-0 si Patricio Jose Ferreira ng Timor Leste, bago nanaig sa Singaporean na si Muhammad Shaheed Alam Bin Meqsud Alam 7-6, 6-4 at kay Kasidit Samrej ng Thailand na nagretiro sa kanilang laro dahil sa cramps sa quarterfinals, 7-6, 5-7, ret.

Pero sa pagsapit ng semifinals, pinayukod din si Lim ng isa ring Vietnamese na si Daniel Cao Nguyen, 3-6, 4-6. Nanalo ng gold medal sa All-Vietnamese finals si Ly kontra kay Cao Nguyen, 6-2, 6-4.