Gobyerno, galaw-galaw sa sobrang mahal na galunggong — Marcos

Umaaray ang mga tindero at mga mamimili sa dumobleng presyo ng galunggong at iba pang isda sa ilang pangunahing palengke sa Metro Manila.

Ayon kay Senador Imee Marcos, chairperson ng Senate Committee on Economic Affairs, mas mahal pa ang presyo ng GG sa karneng manok at baboy sa pamilihan kaya dapat itong solusyunan agad ng pamahalaan.“Ang sosyal na talaga ng GG ngayon dahil sa sobrang mahal. Hindi na siya poor man’s fish. Mas mahal pa ang GG sa presyo ng manok, baboy at baka. Hindi naman siguro dapat nakanganga na lang tayo sa presyuhang ito. Gawan sana ito ng paraan ng gobyerno,” ayon kay Marcos.

Pinuri naman ni Marcos na ang agarang pag-apruba ni Agriculture Sec. William Dar na umangkat ng 45,000 metric tons ng GG at mackerel para mapunan ang kakulangan ng suplay nito sa bansa.