14 na dayuhan, inilalako sa condo, buking

Nailigtas ng mga tauhan ng Women’s and Children’s Protection Desk (WCPD) ng Philippine National Police (PNP) at Parañaque-DSWD ang isang babaeng Chinese at 13 pang dayuhan na may iba’t ibang nasyunalidad na sinasabing ibinubugaw umano sa mga parukyano sa isang condominium sa Parañaque City, kamakalawa ng gabi.

Nasa kustodiya ng tanggapan ng WCPD sa Camp Crame, Quezon City ang mga dayuhan.

Patuloy pang inaalam ang pagkakakilanlan ng manager na nag-recruit sa mga biktima.

Ayon sa inisyal na ulat, nagsagawa ng rescue operation ang mga tauhan ng WCPD ng PNP sa pangunguna ni Lt. Col. Samuel Mina at ng Parañaque-DSWD sa Bay Tower 1 Condominium, Roxas Boulevard, Bgy. Tambo sa Parañaque City, alas-8:00 ng gabi.

Nagsumbong ang biktimang Chinese sa awtoridad kaugnay sa nagaganap na pambubugaw umano sa kanila ng kanilang manager dahilan upang agad nagsagawa ng operasyon ang WCPD.

Pagdating sa condominium, nailigtas ang Chinese at 13 iba pang dayuhan na pinaniniwalaang biktima ng human trafficking sa lugar.

Nagsasagawa na ng imbestigasyon at follow-up operation ang mga awtoridad sa naturang kaso.