Dalagita, 2 days nawala.. 16-anyos pinatay, isinako, itinapon sa kanal

Photo: YzhGaming

Wala nang buhay nang matagpuan ang 16-anyos na babae na nakasilid sa sako at itinapon sa irrigation canal sa Purok Silang, Bgy. Punong Grande Banga, South Cotabato.

Nabatid mula kay South Cotabato Police Director Colonel Jemuel Siason, una nang napaulat na nawawala noong Lunes ang dalagita na itinago sa pangalang Maureen, Grade 10 sa Notre Dame of Banga, matapos hindi umuwi. Nakasuot pa ng uniporme ang biktima nang makita ang katawan nito sa irrigation canal.

Nakatali rin ang dalawang kamay ng biktima nang marekober ng awtoridad.

Nakatakdang isailalim sa post-mortem examination ang biktima habang patuloy na ring sinisiyasat ang motibo ng pagpatay sa dalagita.