SEAG shooting: 2 gold sa women’s at team event

Photo: Team Pilipinas 2019 Sea games

Pinukol ni Philippine Navy officer Marly Martir ang magkahiwalay na gold medal ng bansa sa women’s WA 1500 Precision Pistol Course individual at team sa 30th Southeast Asian Games kahapon sa Marine Corps Training Center sa Makati City.

Rumehistro ang Jagnaya, Capiz-native ng kabuuang puntos na 1450-60x sa women’s individual WA 1500 PPC para sa unang gold medal nito. Dinaig ng Navy woman si Pratiwi Kartikasari ng Indonesia sa nakuha nitong 1445-62x para sa silver medal at Yusliana Mohd Yusof ng Malaysia na nakakolekta ng 1441-49x para naman sa bronze medal. Nabigo si 2015 Singapore Pistol Precision champion Elvie Baldivino na makapasok sa podium finish ng makakuha lang ito ng 1429-53x na sapat para sa 9th place, habang 4th place ang tinapos ng kasama ni Baldivino sa 2015 Games silver medal sa Team na si Franchette Shayne Quiroz na may 1441-48x. Nagtulong-tulong naman sina Martir, Baldivino at Quiroz upang makuha ng pambansang koponan ang ikalawang gold medal sa WA 1500 Precision Pistol Course team event sa kabuuang 4320-161x upang maungusan ang Indonesian team nina Kartikasari, Ayu Dini Fitriasih at Eva Triana na may 4313-164x para sa silver, samantalang bronze medal ang nakuha nina Yusof, Azeera Abd Halim at Salzuriana Zubir ng Malaysia sa pag-aambagan na 4279-143x iskor.