Hatol sa Maguindanao massacre, Ilalabas sa Dec. 19

Itinakda na ng Quezon City Regional Trial Court ang petsa ng promulgasyon kaugnay ng kaso ng Maguindanao massacre.

Batay sa desisyon ni QC RTC Branch 221 Judge Jocelyn Solis-Reyes, ang pagbaba ng hatol sa mga akusado sa masaker sa Maguindanao ay gagawin sa Disyembre 19, ganap na 9:00 ng umaga sa QC RTC-Annex, Camp Bagong Diwa, Bicutan, Taguig.

Matatandaang, naganap ang Maguindanao massacre noong November 23, 2009.

Nito lamang Nobyembre ay ginunita ang ika-10 taon ng karumal-dumal na krimen na ikinamatay ng 58 katao, kabilang na ang 32 mamamahayag.

Ikinatuwa naman ni Justice Sec. Menardo Guevarra ang anunsiyo ng QC RTC.

Sa wakas aniya ay dumating na rin ang pìnakahihintay ng lahat matapos makapagprisinta ang prosekusyon ng halos 200 testigo sa kaso at mahigit 100 naman sa panig ng depensa sa nakalipas na halos sampung taong pagdinig sa kaso.