Esportsplay gaming at LGD nagkasundo

Higit na mapapahusay ang talento ng Pinoy gamers nang isapormalisa ng Esportsplay Gaming ang pakikipag-tie up sa isa sa kinikilang professional DOTA 2 teams sa LGD.

Opisyal na nagsanib-puwersa ang dalawang grupo upang itatag ang LGD International na tutuklas, hahasa at bubuo ng core players mula sa Pilipinas at Southeast Asia upang sumagupa sa The International (T.I), ang pinakamalaking DOTA 2 tournament.

Lumagda sina Esportsplay Gaming Chairman at CEO Ivan Angelo Cuevas at COO John Tse sa kasunduan kasama si LGD General Manager Pan Fei at LGD CEO Pan ‘Ruru’ Jie bilang partners sa launching ng ‘LGD International Launch Party: A Collab of LGD & Esportsplay Gaming’ sa Conrad Hotel. “The country has produced many esports players. Esports Gaming is planning to solidify the Philippines in the Esports map with this collaboration with one of the best teams in the world,” saad ni Cuevas.

Nagkaroon din ng tsansa ang fans, gamers, at Esports enthusiasts sa event na makita ang star players na sina Ah Jit, Chuan, at Ruru sa isang friendly match. “We hope we can bring the Philippines esports to higher level and help Filipino DOTA 2 players succeed in international tournaments,” ani Ruru. Pakay ng Esports Gaming na magtatag ng LGD International’s training headquarters sa Pampanga at gaming arena sa Cebu.