Motibado sa SEAG ang Squash, nang mag-silver

Magsisilbing malaking motibasyon para sa dalawang top-squash player ng bansa ang nakuhang medalya sa katatapos lang na 2019 Singapore Squash Open, Sabado ng gabi sa Kallang Squash Centre sa Singapore para mas pagbutihan pa ang kampanya sa 30th Southeast Asian Games sa bansa simula Nob 30-Dis. 11.

Kinapos ang 2017 SEAG silver at bronze medalist Jemyca Aribado sa kanyang laban kay top seed at World number 75 Lai Wen Li ng Malaysia sa iskor na 1-3 (11-6, 4-11, 11-13, 8-11) para makuntento sa silver medal finish sa women’s open title.

Nag-uwi ng bronze medal si 2017 Malaysian meet silver winner Reymark Begornia sa Men’s Open nang yumukod kay eventual runner-up Lee Seung Taek ng South Korea, 0-3 (5-11, 4-11, 7-11) sa semifinals, na tinalo ni Elvinn Keo ng Malaysia sa straight set via 0-3 (4-11, 7-11, 2-11) para sa titulo.

“I think she (Jemyca) can do much better,” wika ni Philippine Squash Academy (PSA) president Robert Bachmann sa panayam ng BULGAR sa messenger.

“They’re ranking is not far apart, you can never tell in squash, even the best or highest ranking players lost to lower ranking. Once you deviate or depart from the game plan that is the end of you,” dagdag ni Bachmann na tila nabitin sa performance ni World number 88 Aribado sa naturang kumpetisyon.

Nagawang manaig ng 26-anyos na tubong Taguig City na si Aribado sa unang set ng magpamalas ito ng magagandang pukol na rumatsada ng 6-0 points para umabante sa 8-3 at manaig sa 9-minute opener.

Ngunit nagawang mailipat ng 19-years-old na Sabah, Malaysia-native ang momentum sa second set ng lumamang ito ng impresibong 8-2 sa Filipina counterpart para tapusin lang ang laro sa 6 minutes.