6 gold, hahabulin ng PATAFA sa 30th SEAG

Anim na mga atleta ng Philippine Athletics Track and Field Association (PATAFA) ang may potensiyal na makapagwagi ng gold medals sa 30th Southeast Asian Games.

Pero hinihikayat din ang silver medalists na gawin nang gold ang laban sa track and field.

“Ang sabi namin sa kanila (possible silver medalists), you guys who are capable of silver, tirahin niyo na. Try your best to win the gold. Kasi sabi nila, a silver can also be gold,” ayon kay PATAFA president Philip Juico.

Sa projection ng PATAFA, nakikita ni Juico ang gold-silver-haul na 6-10-8 sa nalalapit na athletics’ competitions ng biennial simula sa Dis. 5 - 10 na idaraos sa 20,000-seat New Clark City athletics’ stadium sa loob ng 9,500 na ektaryang NCC sports complex.

“Sa triple jump, it’s Harry Diones. He has been a little inconsistent, kaya lang tumataas ang ranking niya. From silver, puwedeng mag-gold iyan. In decathlon, it’s Aries Toledo, who won gold in Kuala Lumpur. Probably good for a silver, pero puwede rin mag-gold,” ayon kay Juico. “We urge them to go for it. Ibigay na ang lahat for our country.”

Malakas din ang laban ngayon ni reigning marathon champion Mary Joy Tabal bagamat naghahandang mabuti ang Thai runner.

“It (gold count) could be anywhere between 6 to 12 golds. That’s (12) the most optimistic,” dagdag niya.

Ang tracksters na posible sa golds ay sina pole vaulters Ernest John Obiena at Natalie Uy, 800-meter specialist Carter Lilly, hurdles champ Eric Cray, sprinter Kristina Knott at bagong recruit na shot-putter na si William Morrison.

Nakalusot ang 21-anyos na si Morrison sa distansiyang 20.4 meters sa Bloomington, Indiana meet noong Hunyo. Ang marka ay lamang ng 2 metro sa 17.42 na kung saan nakuha ni Promrob Juntima ng Thailand ang gold medal noong 2017 SEAG.

Isa pang Fil-Am na si Cray ang pambato sa men’s men’s 400-meter hurdles dahil no. 1 siya sa SEA rankings. Nariyan si Lilly, na kayang bumanat sa 1:48.00 sa men’s 800-meter run.

Sina pole-vaulters Obiena at Uy, ang gold at bronze medalists sa Asian Athletics Championships sa Doha, Qatar na pinakamahusay ngayon sa rehiyon ng Timog Silangang Asya.