Baril nililinis, pumutok.. BFF sapul sa ulo, todas

Patay ang isang lalaki matapos aksidenteng mabaril ng kanyang matalik na kaibigan sa loob ng kanilang silid sa Taytay, Rizal, kamakalawa.

Agad pumanaw ang biktimang si Leonardo Magpusao habang arestado naman ang suspek na si Donhelle Camba, kapwa nasa hustong gulang, residente ng Bgy. Sta. Ana, Taytay.

Ayon sa Taytay Police, natutulog ang biktima sa kanilang kama habang nakaupo naman sa kanyang tabi ang suspek at nililinis ang pistola nang aksidente itong pumutok at tumama sa ulo ng biktima na nagresulta sa kanyang agarang kamatayan.

Narekober ng mga awtoridad sa lugar ang pistola na may magazine at fired cartridge, na ayon sa mga pulis ay pagmamay-ari umano ng biktima ngunit, wala itong mga kaukulang dokumento.

Ang suspek ay nakadetine na sa presinto at nakatakdang sampahan ng kasong reckless imprudence resulting in homicide at paglabag sa Republic Act 10591 o Illegal Possession of Firearms sa piskalya.