SEAG: Sambo team, bibitbitin ng world class athletes

Hindi padadaig ang buong koponan ng National Sambo na magpamalas ng angking kakayanan, lakas at determinasyon sa 30th Southeast Asian Games lalo pa’t bibitbitin sila ng world class athletes.

Sasabak sa unang pagkakataon sa biennial meet ang Sambo Team sa pangunguna nina Universal Reality Combat Challenge featherweight champion Mark Edward Striegl na makikipambuno sa men’s combat under 74kgs, ONE Championship straw weight contender at dating wushu artists Rene Catalan sa men’s combat under 57kgs at 2-time World Sambo bronze medalist at Asian sambo gold medal winner Sydney Sy Tancontian.

Optimistiko si Pilipinas Sambo Federation Inc. secretary-general Paolo Tancontian na kaya nilang makapag-ambag ng 4-5 gold medals sa pagsambulat ng SEA Games sa Nob. 30-Dis. 11 sa iba’t ibang panig ng Luzon.

“I know this team is capable of achieving our target medals. Safe kami sa apat, suwerte sa lima,” pahayag ni Tancontian sa panayam ng BULGAR.

“Kung pagbabasehan naman natin sa sipag, hindi tayo padadaig sa mga makakatapat natin. Talagang tutok ang mga coaches natin kahit ang ating buong Federation,” dagdag nito.

May apat na combat event, dalawang sport at isang mixed 5-man team ang nakatakdang laruin sa Sambo event na magbubukas simula Dis. 5-6 sa Angeles University Foundation Gymnasium sa Clark, Pampanga.

Ilan din sa mga inaasahan ni Tancontian na maaaring magdala ng medalya sa kanila sina mixed Martial Arts fighter Patrick Manicad sa men’s combat under 82 kgs, URCC campaigner Patrick Dos Santos sa men’s combat under 90 kgs at UAAP gold medalist Chino Sy ng UST sa men’s sports under 82 kgs.

Bubuo naman sa 5-man mixed team sina under 52 kgs women sport Helen Aclopen, under 64 kgs women’s combat Mariane Mariano, under 74kgs men’s sports Jedd Andre Diño, under 82 kgs men’s sports Renzo Cazenas at over 82 kgs combat men Jose Rene Mondejar III.