Imbes body camera sa mga pulis — Cayetano.. Media, isama sa anti-drug operations

Malalagay lang umano sa panganib ang buhay ng mga law enforcers kung pagsusuotin ang mga ito ng body camera lalo na sa anti-drug operation.

Ayon kay Speaker Alan Peter Cayetano, mas makabubuti pang magsama ng media na may bitbit na camera kung may anti-criminality operation dahil bahagi ito ng kanilang training.

Gayunman, iba na aniya ang usapan kung mga pulis ang magsusuot ng body camera dahil nakapagpapabago rin ito sa attitude o pag-uugali ng mga awtoridad.

Diin ni Cayetano, hindi naman ginagawa sa ibang bansa tulad ng drug enforcement agency ng Estados Unidos o ng Federal Bureau of Investigation ang pagsusuot ng body camera, maliban na lang kung may malalaking target na operasyon tulad ng international terrorist leader.

Nauna nang sinabi ni Vice-President Leni Robredo na nais nitong magsuot ng body camera ang mga pulis sa kanilang anti-illegal drugs operations.