NU-Nazareth, dumikit sa boy’s volley back-to-back crown

Nakalapit ang National University-Nazareth School sa inaasam nitong back-to-back UAAP Boys’ Volleyball crown matapos ang 25-21, 20-25, 25-19, 25-18 na paggapi nila sa Far Eastern University-Diliman sa Game 1 ng best-of-three finals para sa Season 82 noong Linggo sa FilOil Flying V Centre sa San Juan.

Nanguna si Michaelo Buddin sa naturang panalo ng NU sa itinala niyang 17 puntos mula sa 13 spikes at 4 na blocks kasunod si Arvin Bandola na may 16 puntos at 11 excellent receptions.

“Pinaghihirapan talaga namin ito bawat practice, kapag nagre-relax sila, nire-remind ko sila, kasi may attitude sila na bumibigay eh, kaya pinipilit ko sila ngayon na focus lang sa ensayo in any ways, pati sa pagpapahinga, pati sa pagkain, nire-remind ko sila,” pahayag ni NU coach Edgar Barroga.

Nakatuwang nina Buddin at Bandola si setter Dio Poguita ng 15 excellent sets at 10 digs bukod pa sa 3 puntos gayundin ang libero na si Menard Guerrero na may 22 digs at 16 excellent receptions para sa Bullpups.

Pinamunuan naman ni Jerold Talisayan ang nabigong Baby Tamaraws sa iniskor nitong 18 puntos at 13 receptions.