Mga biktima ng lindol, nalason sa rasyon

Nasa 29 na evacuees ng dalawang magkasunod na lindol sa Mindanao ang nalason sa pagkaing rasyon na ipinamamahagi sa loob ng evacuation center sa Bgy. Malabuan, Makilala, Cotabato.

Ayon sa nakarating na ulat ng National Disaster Risk Reduction and Management Council (NDRRMC), nangyari ang food poisoning nitong Lunes.

Batay sa inisyal na imbestigasyon, matapos mananghalian ng mga evacuees ay nakaranas ang mga ito ng pananakit ng tiyan, pagkahilo at pagsusuka. Napag-alaman na pastel ang kinain ng mga ito.

Agad na dinala ng Regional Health Unit ng Department of Health ang mga apektadong evacuees sa Cotabato Provincial Hospital at Kidapawan City Hospital kung saan sampu sa 29 ay nananatili sa pagamutan.

Samantala, inaalam pa ng mga awtoridad kung saan galing ang ipinamahaging pagkain sa evacuation center.