Vendor niratrat sa loob ng mall

Dedbol ang isang vendor matapos pagbabarilin ng hindi kilalang suspek sa loob ng isang mall sa Caloocan City, kamakalawa ng gabi.

Dead-on-the-spot sanhi ng mga tama ng bala sa iba’t ibang parte ng katawan si Ronnie Litaban, 35, vendor sa isang stall sa loob ng Zabarte Mall at residente ng Marilao, Bulacan.

Itinuturong suspek ang isang James Fajardo, na nagawang makatakas.

Sa nakarating na report kay Caloocan Police Chief Col. Noel Flores, alas-7:00 ng gabi nang maganap ang insidente sa loob ng Zabarte Mall, ground floor sa Camarin Road corner Zabarte Road, Bgy. 175.

Base sa pahayag sa pulisya ng pinsan ng biktima na si Elmer Cadiong, 35, stall owner, namamahala ng kanilang stall ang biktima nang lumapit ang suspek saka naglabas ng baril at walang sabi-sabing pinagbabaril ito sa ulo at katawan.

Ani Caloocan Deputy Police Chief for Administration P/Col. Ferdinand del Rosario, patuloy ang follow-up operation ng mga tauhan ng Caloocan Police North Extension Office (NEO) para maaresto ang suspek habang inaalam pa ang motibo sa insidente.