UST, kinabig ang junior crown ng UAAP baseball

Photo: UAAP

Nakumpleto ng University of Santo To­mas ang kanilang tinagu­riang Cinderella run mata­pos ungusan ang Ateneo de Manila sa Game Three, 4-3, para makopo ang UAAP Season 82 Juniors’ Baseball crown noong Martes sa Rizal Memorial Baseball Stadium.

Tumapos na pinaka­huli noong nakaraang taon, bumawi ang UST nga­­yong season at inang­kin ang ikalawa nilang ti­tulo sa loob ng tatlong taon.

“Overwhelming, ‘yun lang masasabi ko. Lahat ng credit sa laro na ito ay sa mga bata. Luma­ban sila,” wika ni Junior Golden Sox coach Jeffrey Santiago.

Angat ng isa sa bot­tom ng seventh inning, 4-3, na struck out ni UST pitcher John Rafael Rega­lado ang unang dalawang batters ng Ateneo.

Pagkatapos nito, dala­wang Ateneo batters na sina Ezekiel Laygo at Mar­cel Guzman ang uma­bot sa base ngunit hindi na sila nagkaroon ng pag­kakataong umiskor dahil tinapos na ni Regalado ang laban matapos isama sa kanyang mga na struck out si Dax Fabella.

“Na-control ng pit­cher ko ‘yung laro. Sumu­sunod naman siya saka na-kondisyon talaga ‘yun. Matibay ang pitcher ko eh, si Regalado… At saka alam kong humihina na ‘yung pitching ng Ateneo kaya pina-bunt ko na kasi napansin ko last game, hindi makuha ng pitcher kapag nag-bunt kami,” dagdag ni Santi­ago.

“Kapag naka-hit sila, malamang talo kami. Sabi ko tirahin natin nang tira­hin ng curve­ball. Noong hinabol nila, strike­out. Magaling ta­laga ang pitcher ko.”

Napiling Finals MVP, nagbigay lamang ang tubong Naic, Cavite na si Regalado na bumato sa kabuuang pitong innings sa kanilang 7-3 panalo noong Game 2 ng limang hits at isang walk habang pinagretiro nito ang 11 Blue Eaglet batters sa hu­ling laro. Naghahabol pa sa iba­baw ng 5th inning, 1-2 naitabla ni Alwyn Piñero ang laro para sa UST ma­tapos ang isang hit sa cen­terfield ni Bryan Ca­marsi.