Radio broadcaster in-ambush

Sugatan ang isang local radio broadcaster sa Tacurong City sa Sultay Kudarat matapos itong pagbabarilin ng riding-in-tandem, kahapon.

Kritikal sa St. Louis Hospital ang biktimang si Benjie Caballero, station manager ng Radyo ni Juan Tacurong.

Ayon kay Police Lt. Colonel Rey Egos, pasado ala-1:00 ng hapon nang maganap ang pamamaril sa biktima habang ito ay nag-aabang ng tricycle sa Purok Sampaguita, Bgy. New Isabel.

Nabatid na huminto sa kanyang harapan ang dalawang lalaking sakay ng motorsiklo at walang sabi-sabing pinagbabaril siya ng mga suspek.

Ilang tama ng bala ng baril sa iba’t ibang bahagi ng katawan ang tinamo ng biktima.

Bumuo na ng team ang Tacurong Police para tutukan ang naturang tangkang paglikida kay Caballero na sinasabing may kaugnayan sa pagiging hard hitting commentator nito.