PSL Super Cup: ‘Pinas vs. Tsukuba sa mini-tourney

Isang seryosong aksiyon ang sasabakan ng National Women’s Volleyball Team sa paglarga nila sa Philippine Superliga (PSL) Super Cup simula sa Martes sa Filoil Flying V Centre sa San Juan.

Ang Nationals ay nagbalik mula sa 12-day training sa Tokyo noong Biyernes at makasasagupa nila ang tatlong iba pang teams sa mini-tournament na target masuri ang kanilang tibay at kahandaan para sa 30th Southeast Asian Games na iho-host ng bansa sa Disyembre.

Bukod sa dalawang napiling squad ng liga - ang Team Sparkle at Team Shine, susubukin din ng women’s volleyball team ng Tsukuba University ang Nationals sa maikling torneo na ito sa bansa.

Ang Tsukuba ang reigning champion ng All-Japan Intercollegiate Volleyball Championship at tiyak na lalabas ang solidong galaw sa kanilang bakbakan na binuo mula sa walong PSL teams upang matulungan ang Larong Volleyball sa Pilipinas, Inc. sa paghahanda ng national squad para sa biennial meet.

“We organized this tournament to help the national team in its preparation for the Southeast Asian Games,” ayon kay PSL chairman Philip Ella Juico, na siya ring pangulo ng Philippine Amateur Track and Field Association.

Pangungunahan ni Skipper Aby Maraño ng F2 Logistics ang atake ng national team kasama ang teammates na sina Kalei Mau, Dawn Macandili, Majoy Baron, Mika Reyes, Frances Molina, Rhea Dimaculangan, Mylene Paat, Jovelyn Gonzaga, Kat Arado at Eya Laure.

Bubuuin nina dating national team members Aiza Maizo-Pontillas at Denden Lazaro, MJ Philips ang Team Shine kasama sina Remy Palma at Buding Duremdes, Fiola Ceballos, Ria Meneses, Patty Orendain, Mean Mendrez, Bia General, Amanda Villanueva, Eli Soyud, Rebecca Rivera, Des Clemente, Alex Cabanos, Fritz Gallenero at si Carl Dimaculangan ang head coach.

Samantala, si Alohi Robins-Hardy ang bubuo sa Team Sparkle kasama sina Roselyn Doria, Ranya Musa, May Luna; EJ Laure, Jen Reyes, Mina Aganon, Elaine Kasilag,Gretchel Soltones, Jerilli Malabanan, Jasmine Nabor, Alyssa Eroa, Judith Abil, Caitlyn Viray, Dimdim Pacres, Nica Guliman at si Vilet Ponce-de Leon ang head coach.