Basta tapat — P-Digong.. PNP Chief na bobo, aprub!

Iginiit ni Pangulong Rodrigo Duterte na ang pagiging matapat ang tanging pamantayan nito sa pagpili ng susunod na hepe ng Philippine National Police (PNP).

Inamin din ng Pangulo na gumugugol siya ng oras sa pagpili ng ipapalit kay dating PNP Chief General Oscar Albayalde, dahil mas gugustuhin umano niya ang isang matapat na opisyal kaysa isang dekorasyon lamang.

“I should have a wider choice, but ito ang maaasahan ng, maaasahan mo and to all of the Filipino people. My only consideration, the only standard, the only thing that I would ask for of the, of the next PNP chief is honesty,” sabi ni Pangulong Duterte sa exclusive interview ng ABS-CBN News.

“Maski bobo ka, hindi ka number one sa klase mo noon with PNPA or PMA, even if you are the goat of the class but if you are the honest guy, I will go for it,” ayon pa kay Pangulong Duterte.

Matatandaang, kabilang sa lumulutang na pangalan na pinagpipilian para sa susunod na hepe ng Pambansang Pulisya sina Lt. Gen. Archie Francisco Gamboa, Lt. Gen. Camilo Cascolan at Major Gen. Guillermo Eleazar.

Nabatid na si Gamboa ang kasalukuyang officer-in-charge ng PNP at si Cascolan naman ay deputy chief for operations habang si Eleazar ay pinuno ng directorial staff ng PNP.

“Kung meron kang konting medyo, there’s a dent in your reputation, you’re done, wala pala. Out,” dagdag pa ng Chief Executive.