Hotshots, pinagulong ang Dyip

Tinuldukan ng Magnolia Hotshots ang tatlong sunod na pagkabigo matapos pagulungin ang Columbian Dyip, 118-103 sa PBA Governors’ Cup kagabi sa Smart Araneta Coliseum. Tumikada si import Romeo Travis ng 28 points, 8 rebounds at 6 na assists para ilista ang 4-4 record.

Inilabas ng Hotshots ang kanilang bangis sa second quarter para hawakan nila ang 9-point lead, 61-52 sa halftime. Nanatili ang tikas ng Hotshots sa third, umalagwa sa 12 puntos ang kanilang bentahe, 88-76, papasok ng 4th quarter. Hindi na binitawan ng Pambansang Manok ang lamang hanggang sa dulo upang makuha ang inaasam na panalo.

Samantala, sinilo ng Barangay Ginebra Gin Kings ang pangatlong sunod na panalo noong Sabado laban sa Rain or Shine Elasto Painters, 98-89. Kaya naman walang ibang nasa kukote ang crowd favorite Gin Kings kundi sikwatin ang four-game winning streak pagharap nila sa Blackwater Elite sa Miyerkules sa Cuneta Astrodome. Tangan ang 4-2 record, sisimulan ng Gin Kings ang kanilang balak na panalo sa alas-7 ng gabi at tiyak na sasandalan muli nila si import Justin Brownlee na nagtala ng 39 points, 17 rebounds at 8 assists sa kanilang panalo sa Elasto Painters. Bukod kay Brownlee, huhugot din ng puwersa si head coach Tim Cone kina Scottie Thompson, LA Tenoria at Stanley Pringle. “It was really a tough game to manage. We had a big lead and we’re trying to hold them off, but then we fell behind. It’s really a tough game from start to finish. But I think we need this kind of game,” patungkol ni Cone sa kanilang laban sa RoS. “The fact that we had grind-out games is good for us as a team. It would help us to be mentally strong and tough down the stretch as we try to find out a win,” Inaasahang mapapalaban ang Barangay Ginebra sa Blackwater dahil gigil silang kalsuhan ang three-game skid. Nasa ilalim ng team standings ang Blackwater pasan ang 2-6 card.