Lady Bulldogs, dumikit sa elimination round

Iginupo ng defending champion National University ang Ateneo de Manila, 76-59 upang makalapit sa target na elimination round sweep kahapon sa UAAP Season 82 Women’s Basketball Tournament sa Ynares Center sa Antipolo City.

Umarangkada ang Lady Bulldogs sa middle quarters kung saan nilimitahan nila ang Lady Eagles sa 23 puntos upang makalayo at makamit ang panalo.

Namuno sina Kelli Hayes at Angel Surada ang naturang ratsada ng NU sa 58-41 bentahe papasok sa huling 10 minuto ng laro. “I’m just happy na we can accomplish the feat again of having six straight 14-0s.

It’s an accumulation of all the hard work that the girls have been doing. They deserve it, so now we have to be ready for the next steps,” pahayag ni National University coach Patrick Aquino. “Siguro it’s more on mental toughness lang. ‘Yun ang ano namin, you just have to stay focused on the things you have to do. Everyone should be helping out. It should be more of a team contribution.”

Nagposte si Surada ng double-double na 10 puntos at 10 rebounds habang nag-ambag sina Hayes at Rhena Itesi ng tig-10 puntos.

Namuno si Hazelle Yam para sa Lady Eagles na nalaglag sa markang 4-8 sa itinala nitong 18 puntos at 4 assists.

Sa huli laro, sumandig kay Grace Irebu ang University of Santo Tomas sa pagsungkit ng 57-53 panalo kontra Adamson University.

Nagtala ang reigning MVP ng monster performance na 27 puntos at 20 rebounds upang pamunuan ang Growling Tigresses sa pagtapos sa elimination round bilang no.2 seed sa hawak nilang 11-3 record.

Ipinoste ng Congolese center ang 13 puntos ng kanyang kabuuang output sa 4th period kabilang ang dalawang krusyal na baskets sa end game para maunsiyami ang tangkang paggapi sa kanila ng Lady Falcons. Bunga ng kabiguan, bumaba ang Adamson sa markang 8-5.