Iba’t-ibang uri ng migraine

Shane M. Ludovice, M.D / Sabi ni Doc

Dear Doc. Shane, Mahigit isang taon na ako sa trabaho at madalas akong nakararamdam ng pananakit ng ulo. Hindi ako sure kung dahil ba ito sa stress o migraine na kasi sobrang sakit talaga nito lalo na kapag magkakaroon na ako ng monthly period. Dahil dito, hindi ako maka-concentrate sa trabaho. Wala pa akong time magpa-check-up kaya maaari ba ninyong talakayin ang mga sanhi ng pananakit ng ulo? Salamat! — Jas

Sagot Narito ang dalawang klase ng headache: Primary headache — kasama ang migraine, cluster at tension headache.

• Cluster headache. Ito ay matinding sakit ng ulo na tumatagal ng 15 minuto hanggang tatlong oras at maaaring magpaulit-ulit ng anim hanggang walong beses sa isang araw.

• Tension headache. Ito ay mararamdaman sa sentido o kaya ang sakit ay

parang binibigkis ang palibot ng ulo. Secondary headache — sakit ng ulo na ang sanhi ay ibang problema sa katawan tulad ng tumor sa utak o sakit ng ulo kasabay ng flu. Halos15% ng mga tao ay nakararanas ng migraine at higit sa kalahati ay mga babae. Ito ay tumatagal ng 4-72 hours. Narito ang ilan sa mga uri ng migraine:

• Common migraine. Kung saan ang matinding sakit ng ulo ay sinasabayan ng pagsusuka, sensitivity sa liwanag, ingay at masangsang na amoy tulad ng pabango.

• Classical migraine. Nakakapansin sila ng blind spots, flashing o zigzag patterns na liwanag sa kanilang paningin ng 15 minuto hanggang isang oras bago sumakit nang tuluyan ang ulo.

• Abdominal migraine. Madalas itong nararanasan ng mga bata. Kaunti lang ang sakit ng ulo pero meron itong kasamang matinding sakit ng tiyan.

• Hormonal migraine. May kinalaman ito sa pagdating ng kanilang menstrual period. Karaniwan, aatakihin sila ng migraine ng dalawang araw bago o matapos ang kanilang regla.

• Ocular migraine. Kapag umaatake ay lumiliit ang lawak ng paningin nang ilang minuto.

Kadalasan, kaugnay ito ng stress o anumang problema na nakapagpapabagabag sa tao. Mainam na magpatingin sa doktor para makasiguro sa sanhi ng madalas na pananakit ng iyong ulo.