Seguridad ng mga atleta sa SEAG, sagot na ng NCRPO

Tututukang maigi ng kapulisan ang seguridad ng mga atleta upang mailayo sa panganib sa nalalapit na 30th Southeast Asian Games (SEAG) sa bansa simula Nob. 30-Dis. 11.

Titiyakin ng NCRPO ang kaligtasan sa mga pagdarausang laro sa Metro Manila sa tulong ng Metropolitan Manila Development Authority (MMDA) at Bureau of Fire and Protection (BFP) na tatauhan ng 20,000 kapulisan.

Optimistiko ang NCRPO na mabibigyan ng seguridad ang lahat ng kalahok sa biennial meet.

Nakikipag-ugnayan na ang pamunuan ng NCRPO ni chief, Maj. Gen. Guillermo Eleazar sa mga opisyales ng SEAG sa iba’t ibang sports venues sa Luzon.

Gaganapin ang 22 events sa Metro Manila cluster, ang Volleyball sa Ninoy Aquino Stadium habang ang Basketball ay sa MOA Arena.

Gaganapin sa Makati ang Badminton; Speed Skating at Figure Skating (SM Megamall Ice Rink) at Bowling sa Star Mall EDSA-Shaw sa Mandaluyong; Billiards (Manila Hotel Tent), habang ang Taekwondo at Weightlifting sa RMSC.

Sa RMSC rin ang Football maging ang Squash, ang Tennis at Soft Tennis sa Tennis Center sa Manila; Obstacle Course sa Filinvest City sa Muntinlupa o sa UP Sunken Garden, Q.C.; Boxing at Kickboxing sa PICC Forum, Ice Hockey sa MOA Skating Rink, Fencing, Karatedo at Wushu sa World Trade Center sa Pasay; Dadalhin ang Gymnastics (Aerobic, Rhythmic, Artistic) sa Philsports Arena; 3x3 Basketball at ESports sa Fil-Oil Flying V Centre sa San Juan at Cycling Track sa Amoranto Sports Complex.

Magbubukas ang 11-nation sportsfest sa Philippine Arena sa Bocaue at magtatapos sa New Clark City sa Capas, Tarlac.

Lalaruin rin ang 16 events sa Clark, 12 sa Subic sa Zambales, 2 sa Tagaytay at tig-isa sa La Union at Batangas.

Mahigit sa 10,000 atleta ang inaasahan na magmumula sa mga miyembro ng Southeast Asian Nation o ASEAN na kinabibilangan ng mga bansa mula Brunei, Cambodia, Indonesia, Laos, Malaysia, Myanmar, Philippines, Thailand, Timor Leste, Singapore at Vietnam na lalahok sa 543 sports events.