Casimero, handa sa unification bout kontra Tete ng S. Africa

Matutupad na ang inaasam na unification bout ni interim champion John Riel Casimero laban kay World Boxing Organization regular bantamweight champion Zolani Tete ng South Africa sa Nob. 30 sa Birmingham, England.

Inanunsiyo ng Queensberry Promotions ang naturang balita kung saan tatayong main event ang title match up sa anim pang title bouts.

Matagumpay na nadepensahan ng 29-anyos na tubong Ormoc City ang kanyang interim title kay Cesar Ramirez ng Mexico matapos ang 10th round stoppage noong Agosto sa San Andres Sports Complex.

Ang two-division champion na si Casimero (28-4, 19KOs) ay nagawang hawakan ang International Boxing Federation (IBF) flyweight at junior flyweight champion, tatangkaing kunin ang kanyang ika-tatlong titulo laban kay Tete (28-3, 21KOs).

Mayroong 12-game winning streak ang 31-years-old na South-African champion na nakatakda sanang makipagpalitan ng suntok kay Nonito Donaire noong Abril para sa World Boxing super series ngunit nagkaroon ng shoulder injury.

Kasalukuyang hawak pa rin ni Tete ang titulo sapul pa noong 2017 na dati ring may hawak ng IBF junior bantamweight title.

Limang Filipino boxer na ang tinatalo ni Tete na kinabibilangan nina Rexon Flores (KO), Richard Garcia (UD), Eduard Penerio (KO), Jether Oliva (UD) at Arthur Villanueva (UD) para sa interim bantamweight title.

Napanalunan ni Casimero ang interim title nang pabagsakin nito si Ricardo Espinoza Franco ng Mexico sa 12th round noong Abril 20 sa Carson California. Nakalinya ring maglaban-laban sa undercard ang ilang British titles na sina Sam Bowen vs. Anthony Cacace para sa British Super Featherweight title, Lerrone Richards vs. Lennox Clarke sa British Super Middleweight title, Chris Jenkins vs. Liam Taylor sa British Welterweight title, Sam Maxwell vs. Connor Parker para sa WBO European Junior Welterweight title at inaalam pa ang makakalaban ni Hamzah Sheeraz para sa WBO European Junior Middleweight title.