Bago bumaba sa puwesto si P-Digong credit rating ng bansa, aangat pa

Tiniyak ni House Majority Leader Martin Romualdez na mas aangat pa ang credit rating ng Pilipinas bago pa man bumaba sa puwesto si Pangulong Rodrigo Duterte.

Ani Romualdez, ito ay dahil sa mabilis na pagtatrabaho ng Kamara para maaprubahan ang comprehensive tax measures na naglalayong gawing investment destination ang bansa.

Kabilang na rito ang Passive Income and Financial Intermediary Taxation Act at Corporate Income Tax and Incentive Rationalization Act.

Ipinunto ni Romualdez na ang pinakamataas na credit rating na “BBB+” na ibinigay ng Standard and Poor’s Global Ratings sa bansa ay posible pang mai-upgrade sa “A” dahil sa naturang mga tax measures.

Samantala, kumpiyansa naman si Albay Representative at House Ways and Means Committee Chairman Joey Sarte Salceda na makakamit ang “A” rating mula sa international debt watchers kasabay ang malaking kabawasan dulot ng pag-utang ng Pilipinas.

Nakatutok sa kasalukuyan ang Mababang Kapulungan sa mga panukalang batas tungkol sa fiscal reform upang lalo pang palaguin ang ekonomiya ng bansa.