Nahulihan ng shabu.. Dalaw ng preso, kulong

Hindi na nakalabas sa Manila Police District-Station 4 ang 22-anyos na lalaki na nagtangkang magpuslit ng shabu nang dumalaw sa isang preso, kamakalawa ng gabi sa Sampaloc, Manila.

Nakadetine sa custodial facility ng MPD-Stn. 4 ang suspek na si Crisfford Amosco, residente ng Sampaloc.

Inaresto ang suspek ni Patrolwoman Bernadeth Mapue, matapos nitong aminin na may dala siyang shabu na ibibigay umano sa presong si Rolan Garcia.

Bandang alas-5:00 ng gabi nang dumalaw ang suspek sa piitan ng MPD-Stn. 4 at habang nirerekisa ang pitaka, nakita ng pulis na may nakasiksik na P20 na nakabilot.

Hindi na nakapalag ang suspek at inamin nito na may dala siyang shabu na nagkakahalagang P1,500.