Utang sa isang bangko, puwedeng malaman ng kapwa-bangko para makatiyak sa credit status ng nangungut

Dr. Persida V. Rueda-Acosta / Magtanong Kay Attorney

Dear Chief Acosta, Magandang araw! Nais kong malaman kung maaari bang magpalitan ang mga bangko ng aking impormasyon, partikular sa aking mga naging loan? — Sally

Dear Sally, Para sa inyong kaalaman, ang inyong katanungan ay binigyang-linaw ng Section 13 ng Republic Act 10173 o kinikilala bilang “Data Privacy Act of 2012” na nagsasabing:

“SEC. 13. Sensitive Personal Information and Privileged Information. – The processing of sensitive personal information and privileged information shall be prohibited, except in the following cases:

(b) The processing of the same is provided for by existing laws and regulations: Provided, That such regulatory enactments guarantee the protection of the sensitive personal information and the privileged information: Provided, further, That the consent of the data subjects are not required by law or regulation permitting the processing of the sensitive personal information or the privileged information;”

Kaugnay nito, alinsunod sa Sections 4 at 5 ng Republic Act 9510 o kinikilala bilang “Credit Information System Act”, ang mga bangko ay nararapat magsumite sa Credit Information Corporation (CIC) ng basic credit data o impormasyon na ibinigay ng sinumang aplikante o nakatanggap na ng credit facility nito. Ang nasabing impormasyon ay maaaring magamit ng iba pang bangko na awtorisado ng CIC upang malaman ang credit history at financial condition ng sinumang magnanais makinabang sa credit facility ng bangko.

Nawa ay nasagot namin ang inyong katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.

Maraming salamat sa patuloy ninyong pagtitiwala.