St. Clare, champ sa D-League; Coach Bo, balik trabaho na

Hindi bumitaw ang BRT Sumisip Basilan-St. Clare upang magapi ang Marinerong Pilipino, 63-60, at maangkin ang titulo ng 2019 PBA D-League Foundation Cup kahapon sa Paco Arena sa Manila.

Nanguna si Jhaps Bautista na nagtala ng 18 puntos at 8 rebounds, kabilang ang pressure-packed split freethrow sa natitirang 1.5 segundo na sumelyo sa panalo ng Saints, ang kanilang unang kampeonato sa developmental ranks.

“Di bumitaw ang mga bata even after we lost Game One by a big margin. Yun ang reward para sa amin,” ani coach Stevenson Tiu.

“Yun ang wish ko for how many years sa D-League. Palagi akong second place but this one, yun ang difference dahil ngayon puro young ones na. Maybe it’s destined for me.”

Pinangunahan naman ni Mark Yee ang Marinerong Pilipino sa itinala nitong 17 puntos at 14 rebounds.

Nagtala naman si Jonard Clarito ng double-double 13 puntos at 15 rebounds.

Samantala, ang naunang tatlong larong suspensiyon na ipinataw ni University Athletic Association of the Philippines Basketball Commissioner Jensen Ilagan kay University of the Philippines head coach Bo Perasol ay ibinaba sa dalawang laro na lang.

Ito’y matapos ang naganap na pagpupulong sa pagitan nina Perasol at Ilagan noong nakaraang Sabado kung saan humingi ng paumanhin ang Fighting Maroons mentor sa liga at maging kay referee Jaime Rivano.

“Last Saturday was the first time our office heard directly from Coach Bo and we appreciate his sincerity and evident humility in expressing his regret regarding the incident between him and referee Rivano which happened last September 29,” ani Ilagan.

Dahil dito, makababalik na sa bench ng UP si Perasol sa laro ng UP kontra UST sa Miyerkules sa MOA Arena sa Pasay City.