ASF hindi pa tapos, fish kill naman... polusyon pa more!

Tone-toneladang isda ang namatay sa bahagi ng Manila Bay sa Las Piñas at Parañaque.

Kaugnay nito, maraming mangingisda ang umaaray na. Tinatayang aabot umano sa 60 porsiyento ang bumagsak sa kanilang kita sanhi ng nasabing fish kill.

May mga magtatahong din ang todo-diskarte sa gagawing pagba-budget. Anila, mula sa dating 10 sako ay dalawang sako na lang ang kanilang nahahango. Ang kinikitang P500, ngayon ay P300 na lang.

Matatandaang, pitong sako ng patay na isda ang ibinaon ng clearing team ng Department of Public Works and Highways (DPWH) para maiwasan ang kontaminasyon. Literal na mas marami pa raw ang patay na isda kaysa sa basura.

Samantala, base sa pagsusuri ng Bureau of Fisheries and Aquatic Resources (BFAR), mababa ang dissolved oxygen na kinakailangan ng mga isda para mabuhay.

Mataas naman ang antas ng ammonia at phosphates sa tubig. Ibig sabihin, marumi ito.

Ang tanong, saan nanggaling ang polusyon? Maaari raw dahil sa madalas na pag-ulan.

Gayunman, tulad ng palaging paalala ng gobyerno, panatilihin nating malinis ang karagatan at iwasang marumihan, alang-alang sa mga buhay na naroroon na tayo ring mga tao ang nakikinabang.

Nakalulungkot na hindi pa natatapos ang problema sa palay at baboy, ngayon, sa isda naman.