Bronze medal, siniguro ni Petecio sa Aiba Tilt

Hindi mapigilan ang pag-arangkada ni 2014 World Championship silver winner Nesthy Petecio patungong semifinal round at makasiguro ng bronze medal matapos ang impresibong panalo, kahapon sa pagpapatuloy ng mga laban sa 2019 Women’s Boxing Championships sa Ulan-Ude, Russia.

Dinaig ng Southeast Asian Games campaigner sa women’s featherweight si Japanese fighter Sena Ire, 4-1 mula sa mga scores ng judges mula Slovakia (30-27), Sri Lanka (29-28), Mongolia (29-28) at Russia 29-28) habang nakita naman ng judge mula sa Canada ang 29-28 panig sa hapon.

Sunod na makatatapat ng 27-anyos na tubong-Santa Cruz, Davao del Sur si Kariss Artingstall ng England na nagwagi naman laban sa 2016 Rio Olympics campaigner Yodgoroy Mirzaeva ng Uzbekistan. Dinomina ng mas matangkad na si Artingstall ang 23-anyos na Uzbekistan boxer sa pamamagitan ng 5-0 panalo mula sa mga judges galing Canada (30-26), Slovakia (30-26), Sri Lanka (29-27), Philippines (29-27) at Czech Republic (29-27). Bago ito makatungo ng semifinals ay nauna na munang ginapi ng 3-time SEA Games silver medalist si Chinese boxer Qiao Jieru sa round-of-16 ng preliminary rounds sa iskor na 3-2. Malaking panalo ang nakamit nito laban sa Olympian, World at European champion na si Stanimira Petrova ng Bulgaria, 3-2 round of 32, habang nanalo sa panimulang laban ito kay Jucielen Romeu ng Brazil, 3-2, sa round- of-64 elimination round.

Sakaling magwagi ang 2015 Asian Amateur silver medal winner laban kay Artingstall sa semifinals ay makakatapat nito sa championship round ang mananalo kina Lin Yu-Ting ng Chinese Taipei na tinalo si Nilawan Techasuep ng Thailand, 5-0 at Russian Liudmila Vorontsova na nagawang makaligtas kay Jemyma Betrian ng Netherlands, 3-2 sa women’s 57kgs category quarterfinals.

Magsisimula ang mga laban sa semifinal round bukas, Sabado sa ganap na 1:30 p.m. sa lahat ng weight category simula light flyweight hanggang heavyweight division.

Samantala, habang isinusulat ito kahapon kasalukuyang sumasabak sa quarterfinals si bantamweight Aira Villegas laban kay Huang Hsiao-Wen ng Chinese Taipei. Sakaling manaig ay lalabanan nito ang magwawagi kina Jamuna Boro ng India at Amy Sara Broadhurst ng Ireland bukas ng hapon. Nauna nang tinalo ni Villegas si SEAG contender Silpa Lau Ratu ng Indonesia, 5-0 sa round-of-16 preliminary rounds.